Home Archivio XIII Edizione - 2012 Le poesie vincitrici della XIII edizione - Tema Libero
Le poesie vincitrici della XIII edizione - Tema Libero
Tema Libero

1 posto
Imbrunire di Angela Dipasquale

(In attesa di pubblicazione)

2 posto

Sulu tri jorna di Santo Grasso              

Li notti, smanìusa‘un pigghiu sonnu,

fazzu la guerra cu li me’ pinzeri,

ca stannu svigghi e dòrmiri nun vonnu

purtànnimi o passatu d’anni arreri;

 

cu ‘a zagara d’aranciu ‘nti capiddi,   

‘u velu longu, biancu ‘mmaculatu,

tinutu di du’ beddi picciriddi,                      

e cu me patri a bracciu, emozionatu.

 

Lu cori mi batteva ‘un sacciu quantu, 

‘a trimaredda ‘un la putìa firmari,         

fici priera ‘un sacciu a quali santu       

pi lacrimi di gioia assicutari;               

 

di chù quannu lu visti ‘ntu purtuni

di la nostra chisudda a m’aspittari,

vistutu comu un nobili, riccuni,

riccu d’amuri ca m’avìa a dari.

 

A iddu desi tuttu lu me amuri

ca di li figghi, poi mi fici matri,

avanti ‘u munnu, avanti lu signuri,

ammaliàta di so’ occhi latri.

 

Ora d’occhi di masculu spartanu

ca di lu mari hannu lu culuri

nun mi tàlianu chiù, sunnu luntanu

addivintaru friddi e senza amuri.

 

Mai a lu munnu iu putìa pinzari

c’avìa di spini prontu lu cuscinu,

ca ‘nta li modi iddu avìa canciari,

signànnimi pi sempri lu distinu.

 

Pi mia si rivutàu lu munnu sanu,

l’arma e lu cori ‘i sentu viulintati,

pi junta ora allonga puru ‘i manu:

senza mutivu buscu vastunati.

 

Haju pruvatu di mi ribillari,

ma nuddu l’ha sintutu la me vuci,

forza nun haju chiù mancu ‘i ciatari

mi sentu comu a cristu, misa ‘ncruci

 

e mentri nuddu senti, nuddu vigghia,

scunfitta vaju ‘ncontru a la me sorti:

“doppu” la genti si fa meravigghia,

parrannu pi tri jorna, da me morti!
3 posto
Il due di maggio di Santo Destasio

Dui Maggiu.U suli a picu nta chiazza do casteddu.
Picciriddi ca arrirunu taliannu n'aceddu.
Du carusi si vaddunu ritti ritti nta l'occhi.
Da chisiuzza i san Mauru sentu reci rintocchi.

Veli ianchi nto mari senza nfilu di ventu
nmecchiu ca so pinsioni sarricoggjhi cuntentu.
Nte sirili di ferru tanta genti assittata
quattru iocunu a scupa pi passari a iunnata.

"Scappa! scappa!" "Chi succeri?" "Sta sparannu Pippu u pazzu"
"Sta ammazzannu a tutta a genti ca si trova nto Palazzu"
"Scappa curri ascuta a mmia""Ma cchi ffù picchì sti spari"
"Rici ca l'anu trattatu comu nfissa tutti pari."

Cincu motti stamatina si cuntanu nto Palazzu.
Nuddu mai potrà sapiri chi passau ppa testa o pazzu.
Pippu si ivu a ammazzari nta na Chiesa di Vittoria.
Si puttau i "picchì" rappressu chiusi intra a so memoria.